Мадриднинг «Атлетико» клуби қанот ҳужумчиси Жулиано Симеоне Англия Премьер-лигасининг бир қатор клублари қизиқишига қарамай, жамоасини тарк этиш ниятида эмас.
Бу ҳақда инсайдер Экрем Конур хабар бермоқда.
Манбанинг маълум қилишича, аргентиналик футболчига «Манчестер Юнайтед», «Манчестер Сити» ва Лондоннинг «Тоттенхэм» клублари қизиқиш билдирмоқда.
Айни пайтда 23 ёшли вингернинг бозор қиймати 40 миллион еврога баҳоланмоқда. Унинг «Атлетико» билан амалдаги шартномаси 2030 йил ёзига қадар мўлжалланган.
Эътиборлиси, Симеоненинг шартномасида 500 миллион евро миқдорида товон пули белгиланган. Яъни ушбу маблағ тўланган тақдирда, футболчининг шартномасини муддатидан аввал бекор қилиш мумкин.
Жулиано Симеоне Испания Ла Лигасининг жорий мавсумида саккизта учрашувда майдонга тушиб, иккита гол ва иккита голли узатмани ўз ҳисобига ёздириб қўйган.
