Мадриднинг «Реал» клуби 25 октябрь куни «Барселона»га қарши бўлиб ўтадиган «эл-класико»да Винисиус Жуниорнинг иштирок этишига умид қилмаяпти.

Бразилиялик ҳужумчи кеча Испания Ла Лигасининг 8-туридан ўрин олган «Вильярреал»га қарши учрашувда рақиб футболчисининг сочидан тортгани учун қизил карточка олиб, майдондан четлатилган эди.

The Touchline нашри журналист Аранча Родригесга таяниб хабар беришича, «Реал» раҳбарияти Винисиус учта учрашувга дисквалификация қилиниши мумкин деб ҳисобламоқда.

Мадридликлар апелляция бериш орқали жазо муддатини иккита ўйингача қисқартириш мумкинлигига умид қилмоқда. Бироқ бу ҳам бразилиялик футболчининг «эл-класико»да иштирок этиши учун етарли бўлмайди.

Шу сабабли «Реал» Винисиуснинг «Барселона»га қарши муҳим баҳсни ўтказиб юбориши муқаррар, деб ҳисобламоқда ва ҳозирча унинг ушбу учрашувдаги иштирокига таянмаяпти.

Эслатиб ўтамиз, «Барселона» ва «Реал» ўртасидаги навбатдаги «эл-класико» 25 октябрь куни каталонияликлар майдонида бўлиб ўтади.