«Манчестер Юнайтед» ҳужумчиси Жошуа Зиркзее Италиянинг «Наполи» клубига ўтиш бўйича келишувга эришди. Трансфер келаси йилнинг январь ойида амалга ошиши кутилмоқда. Бу ҳақда Football365 нашри хабар берди.
Манба маълумотига кўра, нидерландиялик футболчининг Неаполь клубига ўтишида «Манчестер Юнайтед»нинг собиқ ўйинчилари Расмус Хойлунн ва Скотт Мактоминей муҳим роль ўйнаши мумкин. Айни пайтда «Наполи» шарафини ҳимоя қилаётган ушбу футболчилар Зиркзеенинг трансферини қўллаб-қувватлаши эҳтимол қилинмоқда.
Шу билан бирга, ҳужумчининг хизматларига Туриннинг «Ювентус» клуби ҳам қизиқиш билдирмоқда.
Аввалроқ «Манчестер Юнайтед» раҳбарияти таркибдаги кадрлар билан боғлиқ муаммолар туфайли январь ойидаги трансферлар бозорида янада фаол ҳаракат қилиш имкониятини кўриб чиқаётгани хабар қилинган эди.
Эслатиб ўтамиз, Жошуа Зиркзее 2024 йилнинг ёзида Италиянинг «Болонья» клубидан «Манчестер Юнайтед»га тахминан 36,5 миллион фунт стерлинг (43 миллион евро) эвазига ўтган.
Нидерландиялик ҳужумчи жорий мавсумда Манчестер клуби сафида 5 та учрашувда майдонга тушди, бироқ ҳозирча гол ёки голли узатма қайд эта олмади.
Transfermarkt портали маълумотига кўра, айни пайтда Зиркзеенинг трансфер қиймати 20 миллион еврога баҳоланмоқда.
