«Manchester Yunayted» hujumchisi Joshua Zirkzee Italiyaning «Napoli» klubiga o‘tish bo‘yicha kelishuvga erishdi. Transfer kelasi yilning yanvar oyida amalga oshishi kutilmoqda. Bu haqda Football365 nashri xabar berdi.

Manba ma’lumotiga ko‘ra, niderlandiyalik futbolchining Neapol klubiga o‘tishida «Manchester Yunayted»ning sobiq o‘yinchilari Rasmus Xoylunn va Skott Maktominey muhim rol o‘ynashi mumkin. Ayni paytda «Napoli» sharafini himoya qilayotgan ushbu futbolchilar Zirkzeening transferini qo‘llab-quvvatlashi ehtimol qilinmoqda.

Shu bilan birga, hujumchining xizmatlariga Turinning «Yuventus» klubi ham qiziqish bildirmoqda.

Avvalroq «Manchester Yunayted» rahbariyati tarkibdagi kadrlar bilan bog‘liq muammolar tufayli yanvar oyidagi transferlar bozorida yanada faol harakat qilish imkoniyatini ko‘rib chiqayotgani xabar qilingan edi.

Eslatib o‘tamiz, Joshua Zirkzee 2024 yilning yozida Italiyaning «Bolonya» klubidan «Manchester Yunayted»ga taxminan 36,5 million funt sterling (43 million yevro) evaziga o‘tgan.

Niderlandiyalik hujumchi joriy mavsumda Manchester klubi safida 5 ta uchrashuvda maydonga tushdi, biroq hozircha gol yoki golli uzatma qayd eta olmadi.

Transfermarkt portali ma’lumotiga ko‘ra, ayni paytda Zirkzeening transfer qiymati 20 million yevroga baholanmoqda.