Испаниянинг «Осасуна» клуби бош мураббий Луис Мигель Рамис билан ҳамкорликни тўхтатганини расман эълон қилди.

Клуб матбуот хизматининг маълум қилишича, испаниялик мутахассис билан биргаликда унинг мураббийлар штаби аъзолари ҳам жамоани тарк этган.

Рамис жорий йилнинг ёзида «Осасуна» бош мураббийи этиб тайинланган эди. Унинг қўл остида жамоа саккизта учрашув ўтказиб, иккита ғалаба қозонди, икки марта дуранг ўйнади ва тўртта баҳсда мағлубиятга учради.

Испания Ла Лигасининг дастлабки саккизта туридан сўнг «Осасуна» 8 очко билан мусобақа жадвалида 16-ўринни эгаллаб турибди.

Маълумот учун, Луис Мигель Рамис мураббийлик фаолияти давомида «Бургос», «Эспаньол», «Тенерифе», «Альбасете», «Альмерия», «Реал Кастилья» ҳамда Мадриднинг «Реал» клуби 19 ёшгача бўлган футболчилар жамоасини бошқарган.

Ҳозирча «Осасуна»нинг янги бош мураббийи ким бўлиши маълум қилинмаган.