Франциянинг «ПСЖ» клуби бош мураббийи Луис Энрике ўз фаолияти давомида эришган муваффақиятлари ва келгусидаги мақсадлари ҳақида фикр билдирди.

Испаниялик мутахассис ҳозиргача қўлга киритган ютуқларидан мамнун эканини таъкидлар экан, совринлар учун курашиш иштиёқи ҳамон юқори эканини маълум қилди. Шу билан бирга, у футболда мағлубиятни ҳам муносиб қабул қилиш муҳимлигига эътибор қаратди.

«Ҳозиргача эришган барча ютуқларимдан жуда мамнунман. Бироқ ҳали ҳам яна кўплаб совринларни қўлга киритиш истагим бор.

Шу билан бирга, мағлубиятга учрайдиган вақт келганда, уни имкон қадар муносиб қабул қилиш керак. Чунки ўша пайтда бошқа жамоа, бошқа мураббий, бошқа оила ёки бошқа клуб ғалаба қозонади ва улар бахтли бўлишади.

Ҳаётнинг ўзи шундай», — дея Луис Энрикенинг сўзларини келтиради Marca нашри.

Маълумот учун, 56 ёшли Луис Энрике 2023 йил ёзидан буён «ПСЖ» бош мураббийи сифатида фаолият юритмоқда.

Шу вақт мобайнида Париж клуби испаниялик мутахассис қўл остида 13 та совринни қўлга киритган. Улар орасида УЕФА Чемпионлар лигасидаги иккита чемпионлик ҳам бор.