Англиянинг «Борнмут» клуби ҳимоячиси Антониу Силва Криштиану Роналдунинг Португалия терма жамоаси мураббийи Жорже Жезуш билан юзага келган келишмовчилиги фонида тажрибали ҳужумчини қўллаб-қувватлаб, унинг футбол тарихидаги ўрни ҳақида фикр билдирди.

22 ёшли ҳимоячи «Челси»га қарши ўтказилган ва 1:5 ҳисобидаги мағлубият билан якунланган учрашувдан сўнг Роналдуни барча даврларнинг энг буюк футболчиси деб ҳисоблашини таъкидлади.

Силва португалиялик юлдуз билан бир жамоада тўп суриш ва машғулотларда қатнашиш ўзи учун катта тажриба бўлганини қайд этди.

«У билан бирга ўтказган вақтим ажойиб бўлган. Мен болалигимдан Роналдунинг «Реал»даги ўйинларини томоша қилиб улғайганман. Кейинчалик у билан ҳар куни бирга машғулот ўтказиш мен учун жуда катта тажриба мактаби бўлди», — дея Силванинг сўзларини келтиради Португалиянинг A Bola нашри.

Шунингдек, ёш ҳимоячи Роналдунинг нафақат футболдаги, балки жамиятдаги нуфузига ҳам алоҳида тўхталди.

«Мен учун у барча даврларнинг энг буюк футболчиси. Роналду дунёдаги энг катта таъсир кучига эга инсонлардан бири ва Португалиянинг рамзий шахсидир.

У билан бир жамоада ўйнаш ва машғулотларда қатнашиш имкониятига эга бўлганимдан жуда хурсандман», — деди Силва.

Маълумот учун, Антониу Силва Португалия миллий терма жамоаси сафида 20 та учрашувда майдонга тушган.

22 ёшли ҳимоячи жорий йилнинг ёзида «Бенфика»дан «Борнмут»га 25 миллион евро эвазига кўчиб ўтган. Трансфер келишувида қўшимча 5 миллион евро миқдоридаги бонус тўловлари ҳам назарда тутилган.