«Манчестер Юнайтед»нинг собиқ ҳужумчиси Уэйн Руни жамоа ҳимоячиси Лисандро Мартинеснинг клубдаги вазият ҳақидаги оммавий баёнотларини танқид қилди. Аргентиналик футболчи Чемпионлар лигаси умумий босқичининг 2-турида «Атлетико»дан 0:2 ҳисобидаги мағлубиятдан кейин фикр билдирган эди.

«Менимча, Мартинес бу гапларни олдиндан тайёрлаб қўйган. Нега у айнан шу ўйиндан кейин интервью берди? Буни ўзи хоҳладими? Мен унинг бирор нарса ҳақида гапирганини жуда кам эшитганман. Бу ҳолат гўё олдиндан режалаштирилгандек кўринди. Худди у атрофидагилар билан маслаҳатлашиб, чиқиб, шу гапларни айтиши керак деган қарорга келгандек.

Бу ачинарли ҳолат. Ҳамма футболчилар бирдам бўлиши керак бўлган пайтда клуб раҳбариятида нима бўлаётгани ҳақида гапириш ярамайди. Қийин даврларда футболчилар, бош мураббий ва унинг штаби бир ёқадан бош чиқариши керак. Акс ҳолда, бундай гаплар жамоа ичидаги муҳитни бузиб, футболчиларни бир-бирига қарши қилиб қўйиши мумкин.

У жамоадошлари ҳақида салбий фикр билдирмоқда, уларнинг савияси етарли эмаслигини айтмоқда. Бу эса шерикларига нисбатан ҳурматсизликдир.

Очиғини айтсам, бундай гапларни айтиш ҳуқуқи, эҳтимол, фақат Брунуда бордир, чунки у жамоа сардори. Аммо шунда ҳам бундай масалалар ёпиқ эшиклар ортида ҳал қилиниши керак. Футболчилар мураббий билан гаплашади, мураббий эса кейин раҳбарият билан мулоқот қилади.

Бундай интервью клуб ҳозир бошдан кечираётган вазиятни яхшилашга ёрдам бермайди. Аксинча, жамоа атрофидаги шов-шувни янада кучайтиради. Энди футболчилар норози, жамоа беқарор ва улар бир-бирига ишонмаяпти, деган гаплар кўпаяди. Бунинг ҳеч қандай фойдаси йўқ», — дея Рунининг сўзларини Manchester Evening News нашри Amazon Prime эфирига таяниб келтирди.

Чемпионлар лигасининг дастлабки икки турида «Манчестер Юнайтед» уч очко жамғарди. Англия чемпионатида эса олти турдан кейин олти очко билан 13-ўринда бормоқда.