Лондоннинг «Арсенал» клуби бош мураббийи Микель Артета Чемпионлар лигасида «Лилль»га қарши ўтган учрашувда жамоа ҳужумчиси Букайо Саканинг ўйинига баҳо берди.

Умумий босқичнинг иккинчи тури доирасидаги баҳс «тўпчилар»нинг 3:0 ҳисобидаги йирик ғалабаси билан якунланди. Сака иккинчи бўлим ўрталарида захирадан майдонга тушди, аммо гол уришга ва голли узатмани амалга оширишга улгурди.

«У ўзини унчалик яхши ҳис қилмаётган эди, чунки қандайдир касалликка чалинганди. Шу сабабли у асосий таркибда майдонга тушишга тайёр эмасди. Аммо зарурат туғилса, жамоага ёрдам беришни жуда истади. У майдонга тушди ва натижага катта таъсир кўрсатди», — дея Артетанинг сўзларини келтирмоқда Arsenal Radar нашри.

Сака жорий мавсумда барча мусобақаларда тўққизта учрашувда иштирок этиб, тўртта гол урди ва битта голли узатмани амалга оширди.