«Лилль» ҳужумчиси Оливье Жиру 2012–2018 йилларда шарафини ҳимоя қилган «Арсенал» клубининг «Эмирейтс» стадионига қайтиш ҳақидаги таассуротлари билан ўртоқлашди.

УЕФА Чемпионлар лигаси умумий босқичи 2-туридан ўрин олган учрашувда лондонликлар Франция жамоасини 3:0 ҳисобида мағлуб этди.

40 ёшли ҳужумчи баҳсни захира ўриндиғида бошлаб, 78-дақиқада майдонга тушди. Ўйиндан кейин у мухлисларга илиқ кутиб олганлари учун миннатдорлик билдирди.

«Мухлислар ажойиб эди. Менга бағишланган қўшиқни куйлаган «Лилль» ишқибозлари ҳам, албатта, «Арсенал» мухлислари ҳам.

Бироз вақт ажратиб, стадион атрофини айланиб чиқдим. Бу жуда ёқимли бўлди», — дея Жирунинг сўзларини келтирмоқда Canal+.

«Бу ажойиб туйғу, ўзига хос ҳиссиётлар эди. Мен бу ерда беш ярим йил ўтказганман ва улар мени унутмаган.

Инглиз мухлисларининг гўзаллиги ҳам айнан шунда», — дея қўшимча қилди футболчи.

Жиру «Арсенал» сафида 253 та учрашув ўтказиб, 105 та гол урган ва 38 та голли узатмани амалга оширган.