«Манчестер Юнайтед» ва Англия терма жамоасининг собиқ ҳужумчиси Уэйн Руни португалиялик ярим ҳимоячи Бруну Фернандешни жамоанинг асосий таркибидан вақтинча чиқариш керак, деб ҳисоблайди.

«Бруну ҳозирги вазиятдан тўйиб кетгани кўриниб турибди. У клубга келганидан бери ҳар йили бир хил ҳолат такрорланмоқда. Менимча, унинг сабр косаси тўлиш арафасида.

У ажойиб сардор, аммо ҳозир уни майдондан олиб, бироз нафас ростлашига имкон беришнинг айни вақти, деб ўйлайман. Акс ҳолда, у ҳиссиётларини жиловлай олмай қолиши мумкин.

Зўриқиш тобора кучаймоқда. Уни яхши билганим учун айтишим мумкинки, агар ҳаммаси шу тарзда давом этса, вазият янада ёмонлашади», — дея Рунининг сўзларини келтирмоқда derbyderbyderby.it нашри.

Эслатиб ўтамиз, Бруну Фернандеш 2020 йилдан буён «Манчестер Юнайтед» шарафини ҳимоя қилиб келмоқда.