Мюнхеннинг «Бавария» клуби бош мураббийи Венсан Компани УЕФА Чемпионлар лигаси умумий босқичи 2-турида «Викинг»га қарши 3:3 ҳисобида якунланган учрашувдан сўнг ўз фикрларини билдирди.

Норвегия жамоаси кутилмаганда 38-дақиқага келиб 2:0 ҳисобида олдинга чиқиб олди. Бироқ меҳмонлар иккинчи бўлимда ўйин боришини ўзгартириб, ҳисобда устунликка эришди.

74-дақиқада Майкл Олисе майдондан четлатилгач, мюнхенликлар ўн киши бўлиб қолди. 90-дақиқада эса «Викинг» учинчи голини уриб, мағлубиятдан қутулиб қолди.

«Ҳаммасига тўлиқ ўзимиз айбдормиз. Худди дам олиш кунлари «Аугсбург»га қарши 2:2 ҳисобида якунланган учрашувдаги каби, бу сафар ҳам ўйинда устунлик қилдик.

Албатта, ижобий жиҳатларни ҳам қайд этиш мумкин. Умуман олганда, ўйинимиз сифати у қадар паст эмасди. Аммо диққатни йўқотиш ва айрим вазиятларда нотўғри қарорлар қабул қилиш оқибатида хатоларга йўл қўйишда давом этяпмиз.

«Аугсбург»га қарши баҳсда ўйин бошланганидан саккиз сония ўтиб гол ўтказиб юборгандик. Бугун эса бир ярим дақиқадан кейин дарвозамиз ишғол қилинди.

Бундан ташқари, рақибларимиз яратаётган барча хавфли вазиятлар гол билан якунланаётгандек таассурот пайдо бўлмоқда.

Бироқ буларнинг ҳеч бири бизга баҳона бўла олмайди. Чунки ўзимизни бундай вазиятларга ўзимиз тушириб қўйяпмиз», — дея Компанининг сўзларини келтирмоқда Bayern & Germany.

«Бавария» 17 октябрь, шанба куни Бундеслига доирасида ўз майдонида «РБ Лейпциг»ни қабул қилади.