Англиянинг «Астон Вилла» клуби яна бир чап қанот ҳимоячисидан жароҳат сабабли айрилди. Маттео Руджери ўтган дам олиш кунлари «Брентфорд»га қарши 2:2 ҳисобида якунланган учрашувда соннинг орқа қисми мушакларидан жароҳат олди.

Аввалроқ жамоанинг асосий чап қанот ҳимоячиси Иан Матсен ҳам тўпиғидан жароҳат олган эди. Нидерландиялик футболчи ҳозирча умумий гуруҳ машғулотларига қайтмаган ва майдонда якка тартибда шуғулланмоқда.

«Астон Вилла» бош мураббийи Унаи Эмери Чемпионлар лигасида «Фенербаҳче»га қарши учрашув олдидан футболчиларнинг ҳолати ҳақида маълумот берди.

«Ружери каби футболчиларимиз жароҳат олган. Унинг аниқ қанча вақт майдонга тушмаслигини билмайман, аммо бир неча ҳафта керак бўлади. Бир ойдан кўпроқ вақт.

Шу сабабли ечим топишга ҳаракат қиляпмиз. Чунки Матсен ҳам эртанги ўйинга тайёр эмас.

Менимча, унинг аҳволи яхшиланиб бориши керак. Бир неча кундан кейин, эҳтимол, бир ёки икки ҳафта ичида у жамоавий машғулотларга қўшилади. Бу ижобий ҳолат», — деди Эмери.

Чоршанба оқшомидаги учрашувда Аарон Ван-Биссака чап қанот ҳимоячиси вазифасини бажариши кутилмоқда.

Футболчи «Брентфорд»га қарши баҳсда ҳам ушбу позицияда синаб кўрилган эди.