Испания Қироллик футбол федерацияси Интизом қўмитаси Мадриднинг «Реал» клуби ҳужумчиси Винисиус Жуниорни мамлакат чемпионатининг тўртта учрашувидан четлатишга қарор қилди. Бразилиялик футболчига интизомий регламентда назарда тутилган энг енгил жазо қўлланди.

«Вильярреал»га қарши учрашувда (1:0) Винисиус тўп учун курашдан ташқари вазиятда Натан Салибанинг сочидан тортгани учун майдондан четлатилган эди.

Қизил карточка олганидан кейин ҳам бразилиялик футболчи бош ҳакам Исидро Диас де Меранинг қарорига кескин эътироз билдиришда давом этди. Вазият шу даражада кескинлашдики, жамоадошлари Винисиусни тўхтатиб қолишига тўғри келди.

Шу билан бирга, учрашув ҳаками бразилиялик футболчининг айнан қандай сўзларни айтганини тушуна олмаганини таъкидлаган.

Интизом қўмитаси Винисиусни икки хил қоидабузарлик учун жазолади. У тўп учун кураш билан боғлиқ бўлмаган вазиятда зўравонлик ҳаракатини содир этгани учун интизомий регламентнинг 130.2-моддасига асосан иккита ўйинга дисквалификация қилинди.

Ҳакам қарорига эътироз билдиргани учун эса 127-моддага мувофиқ яна иккита учрашувдан четлатилди.

Регламентнинг 130.2-моддасида икки ёки уч ўйинлик дисквалификация назарда тутилган. 127-модда бўйича эса футболчи икки-учта учрашувга ёки бир ойгача бўлган муддатга четлатилиши мумкин.

Шу тариқа, Интизом қўмитаси ҳар икки қоидабузарлик учун ҳам энг кам жазо чорасини қўллашга қарор қилди.

Натижада Винисиус Испания чемпионати доирасида «Севилья», «Барселона», «Расинг» ва «Валенсия»га қарши ўтказиладиган учрашувларда иштирок эта олмайди.