"Манчестер Юнайтед" ҳимоячиси Гарри Магуайр жамоадоши Лисандро Мартинеснинг клубдаги вазият ҳақида билдирган кескин фикрларига муносабат билдирди.

Аввалроқ аргентиналик футболчи манкунианликларнинг муаммоларини ҳал қилиш учун бош мураббийни алмаштириш шарт эмаслигини таъкидлаган эди. Унинг фикрича, клубга кўпроқ сармоя киритилиши ва техник директор ўз вазифасини яхшироқ бажариши зарур.

Мартинеснинг бу сўзлари атрофида катта муҳокамалар юзага келди. Магуайр эса жамоадоши аллақачон узр сўраганини маълум қилди.

"Сўнгги кунларда бу масала атрофида жуда кўп шов-шув бўлди. Мартинес аллақачон узр сўради.

Энди бу воқеани ортда қолдириб, олдинга ҳаракат қилишимиз керак.

У охирги учрашувнинг биринчи бўлимида ажойиб ўйнади. Умид қиламизки, олган жароҳати жиддий эмас", — дея Магуайрнинг сўзларини келтиради Sky Sports.

Қайд этиш жоиз, "Манчестер Юнайтед" Англия Премьер-лигасидаги сўнгги учрашувида "Лидс" билан 1:1 ҳисобида дуранг ўйнади.

Манба маълумотига кўра, манкунианликлар чемпионатнинг дастлабки еттита туридан сўнг мусобақа жадвалида 14-ўринни эгаллаб турибди.