Лондоннинг «Тоттенхэм» клуби ҳужумчиси Ришарлисон Бразилия президентлигига номзод Флавиу Болсонаруни ўзига тегишли хусусий оролни ноқонуний эгаллаб олишда айбламоқда.

The Touchline нашрининг X ижтимоий тармоғида хабар беришича, бразилиялик футболчининг таъкидлашича, Болсонару аввалроқ ундан оролни сотиб олишга уринган, аммо рад жавобини олган.

Шундан сўнг, Ришарлисоннинг даъвосига кўра, бошқа шахслар муайян суд тартиб-таомиллари орқали ушбу ҳудудни ўз назоратига олган. Натижада футболчи оролидан ҳам, унинг учун тўланиши керак бўлган маблағдан ҳам қуруқ қолган.

Маълум қилинишича, Ришарлисон хусусий оролига тахминан 1,7 миллион евро сармоя киритган. Ҳозирда у мазкур ҳолат юзасидан полиция текшируви ўтказилишини талаб қилмоқда.

Флавиу Болсонару — бразилиялик мухолифатчи сиёсатчи. У аввалроқ пул ювиш билан боғлиқ айбловлар юзасидан текширувдан ўтган.

Ҳозирча Ришарлисоннинг айбловлари мустақил равишда тасдиқлангани ҳақида маълумот йўқ.