«Арсенал» бош мураббийи Микель Артета Англия Премьер-лигасининг 7-турида «Ноттингем Форест» устидан қозонилган 1:0 ҳисобидаги ғалабадан сўнг Эзри Конса ва Габриэл Магальяйнснинг ҳаракатларини алоҳида эътироф этди.

Испаниялик мутахассис жамоаси муваффақиятида ҳимоячиларнинг ишончли ўйини ҳал қилувчи аҳамият касб этганини таъкидлади.

«Уларсиз ғалаба қозонишимиз имконсиз эди. Эзри ва Габриэл ажойиб маҳорат ҳамда жисмоний кучга эга. Биз кутганимиздек, улар бутун учрашув давомида ҳаводан узатилган тўпларга қарши курашишларига тўғри келди.

Бундай вазиятлар сонини аниқ билмайман, лекин 50 тага яқин бўлди. Гап фақат ҳаводаги курашларда эмас, балки ҳар бир қайтарилган ҳужумдан кейинги ҳаракатларда ҳам.

Доим юқори тайёргарликда бўлиш ва ҳар бир вазиятда тўғри ҳаракат қилиш осон эмас. Хавф бартараф этилгандек туюлган пайтда Вуд ва Ҳадсон-Одои ўйинга қўшилиб, янги муаммолар туғдиради.

Аммо бу — Премьер-лига. Айнан ўйин сифати уни дунёнинг энг яхши чемпионатига айлантиради», — дея Артетанинг сўзларини келтиради клуб расмий сайти.

Эслатиб ўтамиз, «Арсенал» мазкур учрашувда Нони Мадуэкенинг 80-дақиқада киритган ягона голи эвазига ғалаба қозонди.