Каталониянинг «Барселона» клуби президенти Жоан Лапорта ва «Пари Сен-Жермен» раҳбари Нассер Ал-Хелайфи Чемпионлар лигаси умумий босқичи 3-туридаги ўзаро учрашув олдидан анъанавий раҳбарлар тушлигида иштирок этишди. Бу ҳақда Испаниянинг Mundo Deportivo нашри хабар бермоқда.
Манба маълумотларига кўра, икки клуб расмий делегацияларининг учрашуви кундузи Париждаги ресторанлардан бирида бўлиб ўтган. Клублар ўртасида Европа Суперлигаси лойиҳаси ва ўтган йиллардаги футболчилар трансферлари билан боғлиқ мураккаб муносабатлар тарихига қарамай, раҳбарлар ўртасидаги музокара ва мулоқот ҳурмат, илиқлик ҳамда хушмуомалалик руҳида ўтган.
Биргаликдаги тушлик давомида икки гранд клуб раҳбарлари Европа клуб футболи, янгиланган Европа мусобақалари қандай кечаётгани, шунингдек, келаси ҳафта бўлиб ўтадиган «Олтин тўп» мукофотини топшириш маросимини муҳокама қилишган.
