«Пари Сен-Жермен» ҳужумчиси Хвича Кварацхелия УЕФА Чемпионлар лигаси умумий босқичининг 3-турида «Барселона»га қарши учрашувда (4:2) олган жароҳати сабабли тўққиз ойгача футболдан четда қолиши мумкин. Бу ҳақда спорт физиотерапевти Анхель Вильянуэва маълум қилди.

«Кварацхелиянинг жароҳатида катта болдир суягининг олдинга силжиши кузатилиши мумкин. Бу олдинги хочсимон бойлам шикастланишининг энг шубҳали визуал белгиларидан бири ҳисобланади. Бироқ эҳтиёткор бўлишимиз керак, чунки воқеа вақтидаги тасвир сифати ва камера бурчаги биомеханикани аниқ баҳолаш имконини бермайди.

Тўқнашув вақтида ўнг тизза бўғимида мажбурий вальгус оғиши яққол кўринади: оёқ панжаси таянч нуқтасида қотиб қолган, оёқ эса юклама остида бўлган. Бундай жароҳат механизми олдинги хочсимон бойлам ва ички ён бойлам шикастланишига хос.

Тикланиш муддати — тўққиз ой», — деб ёзди Вильянуэва ижтимоий тармоқдаги X саҳифасида.

Кварацхелия МРТ текширувидан ўтади

L'Equipe нашрининг хабар беришича, грузиялик футболчи жароҳатнинг аниқ хусусиятини билиш учун магнит-резонанс томографияси (МРТ) текширувидан ўтиши керак.

Манбаларга кўра, Кварацхелия 21 октябрь куни тиббий текширувдан ўтади. Футболчининг яқинлари унинг тиззасидаги олдинги хочсимон бойлам узилган бўлиши мумкинлигидан хавотирда. Бу тахминни фақат текширув натижалари орқали тасдиқлаш ёки инкор этиш мумкин.

Эслатиб ўтамиз, «ПСЖ» Чемпионлар лигаси умумий босқичи 3-турида «Барселона»ни 4:2 ҳисобида мағлуб этган эди.