Лондоннинг «Арсенал» клуби Франкфуртнинг «Айнтрахт» жамоаси ҳужумкор ярим ҳимоячиси Жан Узунни ўз сафига қўшиб олиш имкониятини ўрганмоқда.

CaughtOffside нашри маълумотига кўра, «канонирлар» 20 ёшли футболчининг эҳтимолий трансфери устида иш бошлаган.

Бироқ «Арсенал» Узун учун курашда рақобатга дуч келиши мумкин. Чунки «Астон Вилла», «Брайтон» ва «Эвертон» ҳам футболчининг вазиятини диққат билан кузатмоқда.

Манбанинг таъкидлашича, «Айнтрахт» ўзининг иқтидорли ярим ҳимоячиси учун тахминан 60 миллион евро талаб қилиши мумкин.

Жан Узун жорий мавсумда барча мусобақалар доирасида 6 та учрашувда майдонга тушиб, 4 та гол урди ва 3 та голли узатмани амалга оширди.

20 ёшли футболчининг «Айнтрахт» билан амалдаги шартномаси 2029 йилга қадар мўлжалланган.