Дортмунднинг "Боруссия" клуби стадионга ташриф буюрадиган мухлислар учун ўзига хос рағбатлантириш тизимини жорий қилди. Энди учрашув давомида смартфонидан фойдаланмаган ишқибозлар махсус балл тўплаш имкониятига эга бўлади.
Немис клуби ўзининг расмий мобил иловасига "Fan Mode" ("Мухлис режими") номли янги функцияни қўшди.
Ушбу ташаббусдан кўзланган асосий мақсад — мухлисларни телефон экранига эмас, майдондаги воқеаларга кўпроқ эътибор қаратишга ундаш.
"Боруссия" раҳбарияти ишқибозлар стадиондаги муҳитни тўлиқ ҳис қилиши, жамоасини фаол қўллаб-қувватлаши ва футболдан янада кўпроқ завқ олишини истамоқда.
Янги тизим жуда оддий тартибда ишлайди. Мухлис махсус режимни фаоллаштирганидан сўнг смартфонини қулфдан чиқармасдан ўтказган ҳар бир дақиқаси учун балл олади.
Фойдаланувчи телефондан қанча узоқ вақт фойдаланмаса, унинг ҳисобига шунча кўп балл қўшилади.
