"Бавария" раҳбарияти жамоанинг 18 ёшли иқтидорли футболчиси Леннарт Карлнинг майдондан ташқари фаолиятидан норози экани айтилмоқда.

Германия футболидаги энг истиқболли ёш ўйинчилардан бири сифатида баҳоланаётган Карл сўнгги вақтларда нафақат футболдаги ҳаракатлари, балки ижтимоий тармоқлардаги фаоллиги билан ҳам эътибор марказига тушган.

derbyderbyderby.it нашри BILD маълумотларига таяниб хабар беришича, мюнхенликлар раҳбарияти футболчининг шахсий ҳаётини оммага ҳаддан ташқари очиқ намойиш этаётганидан мамнун эмас.

Карл ижтимоий тармоқларда кундалик ҳаётига оид суратлар ва видеоларни тез-тез эълон қилиб боради. Шунингдек, у севгилиси — модель ва блогер Зои Кеппеле билан муносабатларига оид маълумотларни ҳам мухлислари билан бўлишади.

Манбага кўра, "Бавария" мутасаддилари ёш футболчининг бундай фаоллигини маъқулламаяпти. Бу масала клуб ичида ҳам муҳокама қилина бошлаган.

Бироқ раҳбариятнинг хавотири фақат Карлнинг ижтимоий тармоқлардаги фаолияти билан чекланмаслиги мумкин.

Хабарларга қараганда, 18 ёшли футболчининг жорий мавсумдаги ўйинлари ҳам кутилган даражада эмас. Айниқса, ўтган мавсумда намойиш этган ёрқин ҳаракатларидан кейин ундан анча юқори натижалар кутилган эди.