Бугун, 31 октябрь куни Ўзбекистон Суперлигасининг 26-тури доирасида навбатдаги учта учрашув ўтказилди. Икки баҳсда ғолиб аниқланган бўлса, яна бир ўйин дуранг билан якунланди.
Куннинг марказий учрашуви Наманганда бўлиб ўтди. Маҳаллий «Навбаҳор» водий дербисида «Андижон»ни 1:0 ҳисобида мағлуб этди. Учрашув тақдирини 58-дақиқада Ҳусайн Норчаев томонидан киритилган ягона гол ҳал қилди.
Ушбу ғалабадан кейин наманганликлар 52 очко билан турнир жадвалидаги учинчи ўрнини мустаҳкамлади. «Андижон» эса 31 очко билан ўнинчи поғонада қолди.
Ғузорда ўтказилган баҳсда Самарқанднинг «Динамо» клуби «Машъал» устидан 3:0 ҳисобида ишончли ғалабага эришди. Меҳмонлар сафида Жаҳонгирбек Абдусаломов, Анвар Ҳожимирзаев ва Фирдавс Абдураҳмонов гол муаллифи бўлди.
Мазкур натижа самарқандликларга очколари сонини 34 тага етказиб, тўққизинчи ўринга кўтарилиш имконини берди. «Машъал» эса 4 очко билан сўнгги поғонада қолмоқда.
Куннинг яна бир учрашувида «Сурхон» ва «Насаф» жамоалари 1:1 ҳисобида дуранг ўйнади. Термизликлар сафида Торнике Дзебниаури ҳисобни очган бўлса, қаршиликлардан Сардорбек Баҳромов мувозанатни тиклади.
Учрашувнинг 84-дақиқасида «Насаф» футболчиси Муродбек Раҳматов майдондан четлатилди. Шунга қарамай, қаршиликлар дуранг натижани сақлаб қолди.
Бир очко жамғарган «Насаф» 42 очко билан тўртинчи ўринга кўтарилди. «Сурхон» эса 30 очко билан 12-поғонада бормоқда.
Ўзбекистон Суперлигаси. 26-тур
30 октябрь, жума
«Қўқон-1912» – «Қизилқум» – 0:0
«Сўғдиёна» – «Бухоро» – 1:1
«Хоразм» – «Пахтакор» – 0:1
31 октябрь, шанба
«Сурхон» – «Насаф» – 1:1
«Машъал» – «Динамо» – 0:3
«Навбаҳор» – «Андижон» – 1:0
1 ноябрь, якшанба
16:00. «Локомотив» – ОКМК
14 ноябрь, шанба
«Нефтчи» – «Бунёдкор»
