«Бавария» Бундеслиганинг 8-турида Дортмунднинг «Боруссия»си билан дуранг ўйнади (2:2). Бироқ мюнхенликлар учун асосий муаммо натижа эмас, уч нафар футболчининг жароҳат олиши бўлди.

Учрашув давомида Серж Гнабри, Исмоил Сайбари ва Майкл Олисе шикастланди.

«Бавария» спорт директори Макс Эберль Гнабри ва Сайбарининг жароҳатлари жиддий бўлиши мумкинлигини таъкидлади.

«Ҳозирча аниқ ташхис ёки прогноз айта олмайман. Аммо иккала футболчининг жароҳати ҳам жиддийга ўхшаяпти. Шу маънода бу ўйин бизга жуда қимматга тушди», — деди Эберль.

Унинг сўзларига кўра, Олисега оид дастлабки тахминлар нисбатан ижобий.

«Олисенинг жароҳати унчалик жиддий эмасдек туюлмоқда. Бироқ ўйиндан кейинги ҳиссиётлар билан аниқ хулоса чиқариш қийин. Текширув натижаларини кутишимиз керак», — дея қўшимча қилди у.

Футболчиларнинг қанча муддатга сафдан чиқиши тиббий кўрикдан кейин маълум бўлади.

«Бавария» бош мураббий Винсент Компани ҳам тикланиш жараёнини давом эттираётган бир пайтда қўшимча кадрлар муаммосига дуч келиши мумкин.