Златан Ибрагимович ҳам "Милан"нинг дербидаги ғалабасини нишонлашда иштирок этди. У буни Италия бош вазири Жорджа Мелонини тилга олган ҳолда амалга оширди. RedBird компаниясининг катта маслаҳатчиси ўзининг расмий ижтимоий тармоқ саҳифаларида, юмшоқ қилиб айтганда, ғалати деб аташ мумкин бўлган видеони эълон қилди.
Видео бош вазирнинг Рим пойтахт экани ҳақидаги машҳур нутқи билан бошланади. Шундан сўнг Ибрагимовичнинг 2022 йилда жамоа 19-бор Скудеттони қўлга киритганидан кейин "Мапеи" стадиони кийиниш хонасида айтган машҳур ибораси янграйди: "Италия — бу "Милан".
Кейин швециялик футболчининг "россонерилар" либосида ғалабани нишонлаётган лавҳалари намойиш этилади. Экранда эса "That's it" деган ёзув пайдо бўлади. Бу иборани сўзма-сўз "Айнан шундай" деб таржима қилиш мумкин. Бироқ бу ерда сўз ўйини ҳам бор: уни "Италиянинг ўзи шу" маъносида ҳам тушуниш мумкин.
