"Барселона" ярим ҳимоячиси Фермин Лопес Каталония клуби сафидаги 150-учрашувини ўтказди.
23 ёшли футболчи ушбу маррага Чемпионлар лигаси умумий босқичининг 4-турида "Астон Вилла"га қарши кечган баҳсда эришди. "Барселона" ўз майдонида рақибини 3:0 ҳисобида мағлуб этди.
Клуб тарбияланувчиси ҳисобланган Лопес асосий жамоадаги дебютидан буён барча мусобақаларда 150 та ўйин ўтказиб, 38 та гол урди ва 35 та голли узатмани амалга оширди.
Испаниялик футболчининг "Барселона" билан амалдаги шартномаси 2031 йилгача мўлжалланган. Transfermarkt портали унинг бозор қийматини 110 миллион еврога баҳоламоқда.
"Барселона" навбатдаги учрашувини 8 ноябрь куни Испания чемпионатининг 12-тури доирасида "Атлетико"га қарши сафарда ўтказади. Баҳс 9 ноябрга ўтар кечаси Тошкент вақти билан 01:00 да бошланади.
