ОФК Чемпионлар лигасининг саралаш босқичи форматини эълон қилди. Икки клубимиз иштирок этадиган Ғарб минтақасининг саралаш ўйинларига алоҳида тўхталамиз.

Олдиндан таъкидлаб ўтамиз, Ўзбекистоннинг икки клуби "Локомотив" ва "Насаф" ўзаро тўқнаш келмайдилар. Уларнинг йўли турлича.

1) "Насаф" ўз иштирокини 2-босқичдан бошлаши ҳақида маълумот бериб ўтгандик. Бу босқичда қаршиликлар Қатарнинг "Ал-Жайиш" клуби билан тўқнаш келадилар. Ўйин Қатарда бўлиб ўтади. Жамоамиз ушбу жамоа қаршилигини енга олса, сўнгги босқични ҳам сафарда ўтказади. Уларнинг бўлажак рақиби қайси жамоа бўлиши мумкинлигини эса қуйидаги ўйинлардан билиб оласиз.

1-босқич
1. “Ас-Сувайқ” (Уммон) -  “Бусайтин” (Баҳрайн)
2-босқич
2. “Банияс” (БАА) - 1-босқич ғолиби
3. "Ал-Жайиш" (Қатар) - "Насаф" (Ўзбекистон)
3-босқич
2-жуфтлик ғолиби - 3-жуфтлик ғолиби

2) "Локомотив" рақиблари ҳақида тўхталишдан аввал, бир ҳолатга тўхталиб ўтиш лозим. Кувайтга ОЧЛда битта ўрин берилгани ҳақида маълумот берилганди. Амалда эса ушбу мамлакатдан иккита жамоа иштирок этади. ОФК кубоги-2013 ғолиби — "Кувайт" СКга ҳам ОЧЛ саралашида иштирок этиш имкони берилган. Ушбу жамоа ўз чемпионатида ғолиб чиққанини инобатга олсак, Кувайт мамлакати номидан чемпионатда 2-ўринни эгаллаган (ОФК кубоги-2013 финалчиси) "Ал-Қодисия" клуби ОЧЛда қатнашади.

1-босқич
1. “Шабоб ал-Ордон” (Иордания) - "Ал-Қодисия" (Кувайт)
2. "Кувайт" СК (Кувайт) - “Аш-Шорта” (Ироқ)
2-босқич
3. “Лахвия” (Қатар) - 1-жуфтлик ғолиби
4. "Локомотив" (Ўзбекистон) - 2-жуфтлик ғолиби
3-босқич
3-жуфтлик ғолиби - 4-жуфтлик ғолиби

Кўриниб турибдики, "Локомотив" ўз майдонида бўладиган дастлабки ўйинни ОФК кубоги ғолиби "Кувайт" СК ёки "Аш-Шорта" (Ироқ)га қарши бошлайди. Темирйўлчилар ушбу тўсиқдан ўта олишса, ҳал қилувчи ўйинни Иордания, Кувайт ёки Қатар клубларидан бирига қарши майдонга  тушишади.