Бугун Корея матбуотида тарқалган хабарларга қараганда, Ўзбекистон терма жамоасига номзод Лутфулла Тўраев Жанубий Корея Кей-лигаси клубларидан бирига ўтишга яқин турибди.

Хусусан, www.goal.com корейс хизмати шундай ёзади:
"Иккинчи Жепаров Кей-лигага келиш арафасида. Марказий ярим ҳимоячи ҳисобланган Тўраев ўтган мавсумгача "Бунёдкор" шарафини ҳимоя қилиб келди. У кореялик футбол мухлисларига ОЧЛдаги ўйинлари орқали ҳам жуда яхши таниш. Унинг 2012 йил 20 март куни "Поханг" - "Бунёдкор" ўйинида "пўлатчилар" дарвозасига киритган голи ҳам эсимизда. Ўша ўйин 2:0 ҳисоби билан меҳмонлар фойдасига ҳал бўлганди. Тўраев Хитой клубларидан катта молиявий таклиф олган бўлса-да, Кей-лигада ўз кучини синаб кўришни истамоқда. Агенти орқали Кей-лига клубларидан бири билан музокара олиб бораётган Тўраев яқин орада Кей-лигада пайдо бўлиб қолса ажабмас".

Отабек ЙЎЛДОШEВ, Жанубий Корея, Сеул