Ироқ ёшлар терма жамоаси яна бир марта қитъада энг кучли жамоалардан бири эканини исботлади ва Осиё чемпионатида бош совринни қўлга киритди. "Месопатамия шерлари" финалда Саудия Арабистони терма жамоаси устида ғалабага эришди.

Ушбу жамоалар "D" гуруҳининг илк турида ўзаро тўқнаш келишганди ва унда ироқликлар анча осонлик билан 3:1 ҳисобида ғалаба қозонишганди. Бу сафарги ўйин эса анча мураккаб кечди.

Бу баҳсда Саудия зафар қучиши мумкин эди. Ўйиннинг 29-дақиқасида бош ҳакам Ироқ дарвозаси томон пенальти белгилади. Асирийнинг зарбаси эса дарвоза устунига тегиб қайтди. Орадан 4 дақиқа ўтиб эса Ироқ сардори Муҳаннад Каррар дарвозабон билан бирга-бир вазиятга чиқди ва ўткир бурчак остида бўлишига қарамай, дарвозани ишғол қила олди.

Қолган дақиқаларда саудияликлар кичик ташаббусга эришишди, ироқликлар эса кўпроқ ҳимоя ҳақида бош қотиришди. Ироқ дарвозабони ҳам яхши ўйин кўрсатганини таъкидлаш лозим.

Ҳаким Шокир шогирдлари мусобақадаги 6та ўйинда 6та ғалабага эришишди. Чемпионлик йўлида улар Ўзбекистон, Япония, Жанубий Корея каби кучли жамоаларни мусобақадан чиқариб юборишди ва ҳақли равишда чемпионликни қўлга киритишди.

Ёшлар (U22) ўртасида Осиё чемпионати, финал
САУДИЯ АРАБИСТОНИ - ИРОҚ - 0:1
Гол: Муҳаннад Каррар (33)
Ноаниқ пенальти: Асирий (29, Саудия Арабистони)