"Арсенал" устози Арсен Венгер Англия кубогининг чорак финалидан ўрин олган "Ливерпуль"га қарши ўйиндан сўнг, "Челси" бош мураббийи Жозе Моуриньо томонидан ўз манзилига юборилган иқтибосларга жавоб бериб ўтди.

"Ливерпуль" - ажойиб жамоа, буни рақибимиз билан бу сафарги ўйинда ҳам кўрдик. Қандай ажойиб ўйин бўлди. Менга ўйинимизнинг шиддаткор бўлгани ёқди. Ўтган ҳафта "Энфильд"даги йирик мағлубият учун муносиб жавоб бера олганимиздан фахрланяпман", - дея сўз бошлади Венгер.

Лондонликлар мураббийи учрашув бош ҳаками Ховард Уэббнинг иккинчи пенальтини белгиламагани борасидаги саволга шундай жавоб берди: "Вазиятни кўрдим, аммо такрорий лавҳаларни ҳам кўришни истардим".

Шундан сўнг матбуот анжумани Венгернинг Моуриньо ҳақидаги фикрлари янграши билан якунланган. Хабарингиз бор, "беназир" мақомидаги мутахассис Венгерни "омадсизлик бўйича мураббий" деб атаганди.

"Муҳокамага киришмоқчи эмасман, бу аҳмоқона, ҳурматсиз гап бўларди. Шуни аниқ биламанки, Моуриньонинг сўзлари ўз жамоаси "Челси"га қарата айтилган, менга эмас".