Шу йилнинг 26 март куни Осиё кубоги-2015 мусобақасига қуръа ташланади. ОФК мазкур қуръа учун жамоаларни саватчаларга ажратишда ФИФАнинг март ойидаги рейтингини асос қилиб оладиган бўлди. Бу ҳақида Al-sharq.com сайти хабар тарқатди.

ОФК шу пайтгача барча мусобақаларга қуръа ташлаш механизмида аввалги натижаларни асос қилиб оларди. Бу сафар эса бошқачароқ қарор қабул қилинган.

ФИФАнинг февраль ойида эълон қилинган рейтингида Ўзбекистон ОФК давлатлари орасида 4-ўринни эгаллаб  турибди. 5 март куни эса Осиёда саралаш баҳслари бўлиб ўтади ва ушбу натижалар 13 март куни эълон қилинадиган ФИФА рейтингида ўз аксини топади.

Ўзбекистон 5 март куни БАА терма жамоасини мағлуб этса ёки дуранг ўйнаса, терма жамоамиз Осиё давлатлари орасида кучли тўртликка киради (ҳаттоки ғалаба Ўзбекистонни ОФКнинг иккинчи ёки учинчи жамоасига айлантириши мумкин). Осиё кубоги-2015 қуръа нуқтаи назаридан БАА билан ўйиндаги ғалаба биз учун катта аҳамиятга эга. Агар Амирлик терма жамоасидан мағлубиятга учрасак, БАА ва Жанубий Корея терма жамоалари жадвалда биздан ўтиб кетишади.

Қуръа маросими Австралиянинг Сидней шаҳрида ўтказилади. 16та жамоа 4тадан 4та гуруҳга бўлинади. Ҳозирда қитъа чемпионати йўлланмасини қўлга киритган 12та жамоанинг номи маълум: Ўзбекистон, Австралия, Япония, Жанубий Корея, КХДР, Баҳрайн, Кувайт, Уммон, Саудия Арабистони, БАА, Иордания, Эрон. 5 март куни бўладиган саралашнинг сўнгги тури ва май ойида ўтадиган ОФК Чақирув кубогидан кейин барча жамоалар номи аниқ бўлади.