"Ал Фатҳ" - "Бунёдкор" учрашувидан сўнг иккала жамоа бош мураббийлари иштирокида матбуот анжумани бўлиб ўтди.

Дастлаб "қалдирғочлар" бош мураббийи Миржалол Қосимов ўйин ҳақидаги ўз фикрлари билан ўртоқлашди.

"Ўйин қизиқарли бўлди. Аввало бизни стадионда қўллаб турган мухлисларга раҳмат айтмоқчиман. Бугун худди ўз майдонимизда ўйнагандек бўлдик. 3 ойдан кейинги дастлабки расмий ўйинни ўтказдик, менимча бундай ҳолат учун ёмон ҳаракат қилмадик. Ўйинга келсак бизда имкониятлар бўлди. Бироқ улардан фойдалана олмадик. Дуранг натижага нормал қарайман", - деб гап бошлади Қосимов.

- Бугун қайси жамоа ғалабага лойиқ эди?
- Вазиятлар бўйича олиб қаралса, бизда иккита ўта қулай вазият бўлди. "Ал Фатҳ"да эса яққол имконият бўлгани йўқ. Умуман олганда ўйин асосан майдон марказида кечди.

- Ҳимояда яхши ҳаракат қилдинглар. Керак вақтда ҳужум ташкил қилдинглар. Бу олдиндан режалаштирилганмиди?
- Бир нарсани тушунинглар. Бу бизнинг илк расмий учрашувимиз эди. Жамоа футболчилари 70 фоизга тайёрлар. Шу боис очиқ ўйин намойиш эта олмасдик.

Баҳодир Мирзаев
Ал Ҳаса, Саудия Арабистони