Мустақил давлат сифатида Осиё қитъаси футболи ҳавосидан нафас олаётган бўлсак, шу пайтгача БАА терма жамоаси жиддий ютуқларга эришганини эслай олмаймиз. Аммо Амирликнинг ҳозирги авлоди ҳақида ундай дея олмаймиз. Бу футболчилар 2008 йилда ёшлар ўртасидаги Осиё чемпионатини ютиб олишдан бошлади ва кейинчалик Лондон-2012 олимпиадасига ҳам бориб келишди. Шундан кейин ёшлар ва олимпия терма жамоасида ишлаган Маҳди Алини БАА футбол ассоциацияси миллий терма жамоа бош мураббийлигига тайинлади. Бу жамоанинг мағлубиятсиз ўйинлар сони, адашмасак, 15тага етиб қолди. Улар ўтган йили Кўрфаз кубогини ҳам ўз мамлакатларига олиб кетишди. Уларни қитъада "Олтин авлод" дея аташмоқда.

Сайтимиз журналисти Қаҳрамон Аслановнинг фикрича, бу ҳолат узоқ давом этмайди ва бу футболчиларнинг саъй-ҳаракатлари билан БАА футбол державасига айланиб қолмайди. У ўз фикрларини Твиттердаги саҳифаси орқали қуйидагича билдириб ўтди.

"БАА, Қатар каби жамоалар ҳеч қачон Осиёда футбол державаси бўла олмайди. Келажаги порлоқ ёш жамоага эга бўлишлари, маълум вақт оралиғида яхши натижага эришишлари мумкин, максимум. Араблар учун футбол шунчаки ўйин, шуғулланиш учун бир соҳа холос. Катта нарса исташмайди, легионер бўлиб Европага боришмайди. Яшаш тарзи, футболга бўлган муносабати, айтайлик, Африкадаги камбағал араб давлатларидан фарқ қилади. Футболни дам олиш, завқ олиш учун ўйнашади. Қандайдир даражага чиқиш учун бутун вақтини сарфлаб, оғир йўлни босиб ўтишни исташмайди.

"Олтин авлодлар" бўлаверади, келаверади. Аммо улар ҳеч қачон, қачондир Япония, Эрон, Корея даражасига чиқиш учун пойдевор бўлмайдилар. Аслида, Осиё грандлари сафига қўшилиш имконияти Ўзбекистон ва Хитойда кўпроқ. Лекин аниқ режа, лойиҳа ва йўналиш керак. Араблардан фарқли равишда, бизда футбол футболчига ўзини топиш, келажагини таъминлаш ва муаммоларини ҳал қилиш имконини беради. Яъни, етарлича мотивация бор. Манзил бор. Фақат ёшларни ўша манзилга етказиб борувчи футбол системаси, муносабат, мураббийлар зарур", - дея ўз фикрини билдиради ҳамкасбимиз.