Ёшлар лигаси 3-тури доирасида бугун Зоминда «Сўғдиёна» меҳмони бўлган «Динамо» жамоаси сафардан муҳим ғалаба билан қайтди.

Жорий мавсум олдидан таркиб ёш самарқандлик футболчилар билан тўлдиргач, клуб ҳозирча мағлубият нималигини билмай келаяпти. Дастлаб, Қаршидан очко билан қайтган ёшларимиз сўнг «Металлург»ни мағлуб этишганди. Бугун эса Камо Газаров шогирдлари Жиззахнинг «Сўғдиёна» ўринбосарларини 1:2 ҳисобида мағлуб этишди. Дастлаб Муҳаммаджон Ражабов 43-дақиқада ҳисобни очган бўлса, 69-дақиқада Фурқат Ҳасанбоев вазиятни тенглаштирди. Учрашувнинг сўнгги дақиқаларигача ҳужумкорликни тўхтатмаган кўҳна шаҳарликлар ниҳоят ниятларига етишишди. 89-дақиқада яна ўша ёш ҳужумчи Муҳаммаджон Ражабов Самарқанд жамоасини олдинга олиб чиқди, 1:2.

Ўйинга қўшиб берилган 90+5-дақиқада бош ҳакам «Динамо» дарвозаси томон пенальти белгилади. Жиззахлик футболчи томонидан йўлланган зарбани жамоамиз дарвозабони қайтаришга эришди ва «Динамо»нинг ғалабасини таъминлади.

Ёшлар лигаси
3-тур

Сўғдиёна - Динамо - 1:2
Голлар: Ф.Ҳасанбоев 69 – М.Ражабов 43 пен., 89.