“Соғлом бола” йили муносабати билан ташкил этилган “Бунёдкор”-2014” кубоги турнири бугун ўз ниҳоясига етди.

Мамлакатимизнинг деярли барча вилоятларидан ташриф буюрган ёш футболчилар беш кун давомида “Бунёдкор” мажмуаси майдонларида нафақат куч синашдилар, балки доимий мулоқотда бўлиб ўзаро дўст тутиндилар. Вилоятлардан ташриф буюрган иқтидорлар ўз уйларига олам-олам таассуротлар билан қайтдилар.

Мусобақанинг сўнгги кунида барча ўрин эгалари маълум бўлди. Дастлаб натижалар билан таништирамиз:

Тошкент вилояти жамоаси ўз вақтида етиб келмагани учун Муборакнинг “Машъал” клубига техник ғалаба ёзилди ва айнан қашқадарёликлар 11-ўрин эгаси бўлишди.

9-ўрин учун. Бухоро – Навоий – 1:0.
7-ўрин учун. Наманган – Сирдарё – 3:0.
5-ўрин учун. “ЎзДонгЖу” – Андижон – 4:0
3-ўрин учун. “Локомотив” – Тошкент шаҳри – 3:3 (пенальтилар серияси бўйича 2:4).
1-ўрин учун. “Бунёдкор” – “Пахтакор” – 3:0.

Барча учрашувлар ниҳоясига етгач, “Бунёдкор” мажмуаси Бош майдонида турнир ғолиб ва совриндорларининг тақдирлаш маросими ташкил этилди. Бу тадбир ёш футболчиларда катта таассурот қолдирганига шубҳа йўқ. Ташкилотчилар бунинг учун астойдил ҳаракат қилдилар. Барча совринлар ўз эгаларига худди олий даражадаги маросимлардек топширилди. Дастлаб энг яхшилар аниқланди. Унга кўра қуйидаги футболчилар махсус совринларга эга бўлдилар:

“Энг яхши дарвозабон” – Илёс Исмоилов (“ЎзДонгЖу”)
“Энг яхши ҳимоячи” – Жамол Бахромов (“Локомотив”)
“Энг яхши ярим ҳимоячи” – Ҳабибулла Латипов (“Пахтакор”)
“Энг яхши ҳужумчи” – Омон Ғаниев (Андижон)
“Сермаҳсул тўпурар” – Арам Маркарян (“Бунёдкор”)
“Энг яхши ўйинчи” – Қурбон Бобожонов (Тошкент шаҳри).

Сўнгра, мусобақа ғолиби – “Бунёдкор“ жамоаси “Бунёдкор кубоги-2014” Бош соврини, олтин медаллар ва спорт формалари билан тақдирланди. 2-ўрин эгаси – “Пахтакор“ жамоасига кумуш медаллар ва спорт формалари топширилди. 3-ўринни соҳиби - Тошкент шаҳри жамоаси аъзолари бронза медаллари ҳамда спорт формаларига эга бўлишди.

Шу билан, “Соғлом бола” йилига бағишлаб ўтказилган “Бунёдкор”-2014” кубоги турнири ўз ниҳоясига етди. Бу мусобақа энди анъанавий кўриниш олади ва хар йили ўқувчиларнинг баҳорги таътил кунлари бўлиб ўтади.