"Атлетико" бош мураббийи Диего Симеоне чемпионлар лигаси финалида "Реал"га қарши учрашув олдидан фикрлари билан ўртоқлашди.

"Биз етарли даражада мотивацияга эгамиз. Агар босим бўлмаганида, диққатимизни бир жойга жамлаш янада оддийроқ бўлар эди. Ўйин давомида бу жиҳатларни унутишимиз керак.

Коста ва Арда - муҳим ўйинчилар, шунинг билан бирга бу шунчаки номлар, холос. "Реал" қандай ҳаракат қилишини биламиз, аммо ҳар хил вариантларни кўриб чиқдик. Уларга ўйин назоратини топшириб қўймасликка ҳаракат қиламиз.

Охирги икки йилда футболчиларим мени жонкуярлиги билан ҳайрон қолдиришда давом этмоқдалар. Бунинг учун улардан беҳад миннатдорман. Улар мен майдонда кўрмоқчи бўлганим - иштиёқ, бирлик ва жонкуярликни намойиш этмоқдалар. Шунинг учун улар шунчаки спортчи деган номдан баландроқ мақомдалар.

Диего Коста ва бошқа жароҳатланганлар бугун тиббий кўрикдан ўтадилар (23 май - изоҳ бизники std.uz). Кеча уларнинг ҳолати жуда яхши эди, аммо биз уларни яна бир бор кўздан кечиришимиз керак.

Бизда  ўйин вақтида юзага келган вазиятларда нима қилишни биладиган, яхши шаклланган, жипслашган жамоа бор. Шунинг учун бу ерда турибмиз.

Кўпчилик ўйлаганидай, юқори босим остида эмасман, аммо елкамда катта маъсулият турибди. Мени ташвишга солаётган нарса бу - ўйин. Мен бор эътиборимни ўйинга қаратишим ва қолган нарсаларни унутишим керак. Ўйинга кўп танишларим келади. Бу жиддий учрашув бўлади", - дейди Симеоне.