“Бунёдкор” – “Андижон” учрашувидан кейинги матбуот анжуманида биринчи бўлиб “бургутлар” устози иштирок этди.

- Бугун ютқаздик. Аввало “Бунёдкор”ни ҳақли ғалаба билан табриклайман. Шунингдек, Сергей Лушанни бош мураббий сифатидаги илк ғалабаси билан муборакбод этаман. Рақибни ўрганиб чиққандик. Кучли футболчиларга қарши ўйнаш доимо қийин бўлади. Гарчи ютқазган бўлсак-да, шогирдларим бугун мени қўрқмасдан ўйнашганлиги хурсанд қилди. “Бунёдкор” – мамлакат чемпиони. Улар ҳар жабҳада кучлилик қилишди. Бизда ҳам имкониятлар бўлди. Лекин вазиятдан фойдаланишда яна оқсадик. “Сен урмасанг сенга уришади” нақли яна бир карра ўз исботини топди. Ҳужумчиларимиздан кўнглим тўлмаяпти. Биз футболчи бўлган пайтларда ҳужумчилар ўйин тақдирини ҳал қилиб қўйишарди. Ҳозир эса ундайлар бармоқ билан санарли. “Андижон” олий лигада қолишга ҳақли жамоа. Мен “Сўғдиёна” билан ўйиндан кейин ариза ёзганман. Жамоанинг кейинги тақдири борасида рахбарият иш олиб боряпти. Эртага ўрнимда ким ишлайди буни билмайман. Аммо ҳозир ишлашда давом этаётган эканман, демак ишимни охиригача сидқидилдан бажараман, - дейди Азамат Биродарович.