Ўзбекистоннинг биринчи рақамли теннисчиси Денис Истомин (дунё рейтинг жадвалида 45-ўринда) Лондон шаҳри (Буюк Британия)да ўтказилаётган “Улкан тож” туркумига кирувчи дунёдаги тўртта энг йирик мусобақадан бири Уимблдон турнирининг яккалик баҳслари биринчи босқичида россиялик Дмитрий Турсуновни (дунё рейтинг жадвалида 31-ўринда) 7-5, 6-4, 3-6, 6-2 ҳисобида мағлуб этиб, бош соврин учун курашни давом эттирмоқда.

Бу Денис Истоминнинг россиялик теннисчи устидан қозонган қаторасига тўртинчи ғалабасидир. Ушбу муваффақиятдан сўнг Денис Истомин ўзаро учрашувларда ҳам 4:3 ҳисобида олдинга чиқиб олди.

Иккинчи босқичда ҳамюртимиз германиялик Юлиан Райстер билан куч синашади. Райстер биринчи босқичда Майкл Расселлни (АҚШ) 6-4, 6-4, 6-7, 4-6, 7-5 ҳисобида енгди.