“Динамо” - “Насаф” (0:5) учрашувида жамоамиз сардори Артур Геворкян ҳар галгидек ўта фаол ҳаракат қилди. Ўйиндаги деярли барча голларда иштирок этиш билан бирга рақиб, дарвозасини икки марта ишғол этиб, Олий лига тўпурарлари баҳсида 9 та гол билан карвонбошиликни ўз қўлига олди. Ўйиндан кейин туркманистонлик футболчи учрашув ҳақидаги фикр-мулоҳазалари билан ўртоқлашди.

— Йирик ғалаба билан барча мухлисларни табриклайман. Ушбу ютуқ куни кеча фарзандлик бўлган мураббийимизгаям ўзига хос совға бўлди, — дея сўз бошлади Геворкян. — “Динамо”га қарши ўйинда барча бирдек яхши ҳаракат қилди ва мураббийимизнинг кўрсатмасини бекаму кўст уддалашга ҳаракат қилдик. Тезкор гол бизни янада руҳлантирди. Рақибимиз тез жавоб қайтариш учун олдинга ташланди ва биз қарши ҳужумда аниқроқ ҳаракат қилиб, мақсадга эришдик.

— Кейинги турда пешқадам “Локомотив” билан баҳс олиб борасизлар…
— Самарқанддаги ғалабани унутиб, кейинги ўйинга тайёргарликни бошлаймиз. Қизиқарли ўйин бўлишига шубҳа йўқ. Албатта ўз ўйимизда, мухлислар бизни қўллаб туришса, уларни хурсанд қилишга ҳаракат қиламиз.

— Кечаги “дубл”дан кейин олий лигада тўпурарлар баҳсида биринчи поғонага кўтарилдингиз. Ўтган йили ҳам тўпурарлар рўйхатида эдингиз ва якунда 2-поғонани банд этгандингиз. Балки бу сафар энг юқори чўққини забт этиш насиб этар…
— Насиб этса. Ҳозирги ўринда мавсумни якунлаш учун ҳам ҳаракат қиламан. Албатта жамоадошларим ёрдами билан…