Германия терма жамоаси ҳужумчиси, жаҳон чемпионатлари рекордчиси - Мирослав Клозе терма жамоадаги фаолиятини якунлаганини эълон қилди.

Эслатиб ўтамиз, Мирослав Клозе жаҳон чемпионатларида 16та тўп киритиб, жаҳон чемпионатлари тарихидаги энг яхши тўпурари бўлиб турибди.

"Жамоа ғалабаси мен учун доимо муҳим эди. Германия терма жамоаси билан асосий мақсадимизга эришдик. Мен эса, жаҳон чемпионатларидаги ғалаба билан бир қаторда бир қатор шаҳсий ютуқларни ҳам қўлга киритдим. Ҳужумчи сифатида доим жамоадошларимнинг кўмакларига мухтож эдим. Уларсиз, мен бундай ғалабаларга эриша олмас эдим", - дейди ҳужумчи.

"Федерация раҳбариятига, мухлисларимизга, жамоадошларимга ва албатта, 13 йил давомида мен бирга ишлаш бахтига муяссар бўлган мураббийларга рахмат айтмоқчиман. Айниқса, Йоахим Левга алоҳида ташаккур билдирмоқчиман. Айнан унинг қўли остида ўзимни эркин хис қила олдим", - дейди Клозе.

Маълумот учун, Мирослав Клозе Германия терма жамоаси сафида жами 137 учрашувда майдонга тушиб, рақиблари дарвозасига 71та гол урган.