Бугун Бутунжаҳон шахмат олимпиадаси якунига етди. Сўнгги турда Ўзбекистон эркаклар терма жамоаси Ҳиндистонга қарши баҳс олиб борган бўлса, қизлар терма жамоамиз Туркияга қарши дона сурди.

Эркаклар
Ўзбекистон эркаклар терма жамоаси сўнгги тур олдидан жадвалда 7-ўринда бораётганди ва жамоамизда совринли ўринлардан бирини эгаллаш учун имконият сақланиб қолганди. Ҳиндистонга қарши баҳсни йигитлар ёмон ўтказишмади. Ўйин давомида шахматчиларимиз тенгма-тенг кураш олиб боришди, ҳаттоки айрим вазиятларда устунликка эга бўлишди. Аммо ўйиннинг сўнгги қисмини жуда кучли ўтказган ҳинд шахматчилари якунда ғалаба қозонишди. Пиёдаси фарзинга чиқишга бир баҳя қолган Жаҳонгир Воҳидов бор-йўғи дурангга рози бўлган бўлса, қолган шахматчиларимиз мағлубиятни тан олишди. 0,5-3,5.

Натижада, Ўзбекистонни мағлуб этган Ҳиндистон мусобақада 3-ўринни эгаллаган бўлса, вакилларимиз (15 очко) 17-ўрин билан чекланишди. Хитой терма жамоаси чемпионликни қўлга киритган бўлса, 2-ўринни Венгрия эгаллади. Россия, Озарбойжон ва Украина кейинги ўринларни банд этишди.

Аёллар
Ўзбекистон қизлар терма жамоаси Туркия билан дуранг натижа қайд этди. Сарвиноз Қурбонбоева ва Ирина Геворгян ўз партияларида дуранг ўйнашди. Севара Боймуродова оқ доналарда ғалаба қозонган бўлса, Моҳинур Қаҳрамонова қора доналарда мағлуб бўлди. Умумий натижа - 2:2.

Ўзбекистон аёллар терма жамоаси олимпидада 13 очко билан 35-ўринни эгаллади. Терма жамоамиз турнирда 46-тартиб рақами билан мусобақани бошлаганини эслатиб ўтамиз.

Аёллар ўртасидаги мусобақада Россия терма жамоаси ғолибликни қўлга киритди. Улар 11 турнинг 10тасида ғалаба қозониб, бир марта мағлубиятга учради. Хитой ва Украина терма жамоалари 18 очко жамғаришди. Қўшимча коэффициентларга кўра осиёликлар 2-ўринни олишди. Жадвалнинг 4, 5 ва 6-ўринларини Грузия, Арманистон ва Қозоғистон вакиллари банд этишди.