2014 йилнинг январь-октябрь ойлари давомида Мексикада туғилган 80 нафар чақалоқ «Барселона» футбол клуби ва Бразилия терма жамоаси ҳужумчиси Неймар исми қўйилди. Бу ҳақда Mundo Deportivo хабар бермоқда.
Мексикаликлар орасида сўнгги вақтларда ўз фарзандларини машҳур футболчилар шарафига номлаш урф бўлган.
Неймардан ташқари, «Реал Мадрид» ва Португалия терма жамоаси ҳужумчиси Криштиану Роналду шарафига 17 нафар болага исм қўйилган бўлса, «ПСЖ» ва Швеция ҳужумчиси Златан Иброҳимович шарафига уч нафар мексикалик чақалоқ Златан исмини олган.
Маълумот учун, 2013 йил сентябрида, Аргентинада фамилияни исм сифатида қўйиш тақиқланганига қарамай, бир оила ўз фарзандига Месси деб исм қўйиш учун рухсат олганди.
Қайд этиш жоиз, 2014 йил июлида Хоразм вилоятида туғилган чақалоққа Роналдо деб исм қўйилгани маълум бўлганди.
