Криштиану Роналдунинг агенти Жорже Мендеш мижозининг келажакдаги режалари ҳақида тўхталиб ўтди:

“Криштиану "Реал"да кўп йилларини ўтказмоқчи. Ҳозир у 29 ёшда ва биз уни жисмоний жиҳатдан бунга тайёр эканлигини кўрмоқдамиз. Роналду клуб билан яқиндагина шартномасини узайтиради, шунинг учун ҳам шартномани узайтириш ҳақида музокаралар бўлиб ўтгани йўқ. Ҳозирча бу ҳақда ўйлашга эрта, чунки шартнома тугашига ҳали 3 йил бор, бироқ Роналдунинг мақсади — "Мадрид"да яна бир неча йиллар ўйнашдир. Мижозим "қаймоқранглилар" сафида фаолиятини якунлашга тайёр.

Ҳозирда Роналду ўйинга бир неча йиллар илгаригига нисбатан кўп нарсасини бермоқда. Бу шундай, чунки Криштиану каби ҳеч қайси футболчи дунёда энг кучли бўлишни истамайди. Жисмоний ва озиқланиш жиҳатидан ундан устун бир қанча футболчилар бўлиши мумкин, бироқ Роналду қилаётган ишларни ҳеч ким такрорлай олмайди. У майдонда ўзининг энг кучли сифатларини намойиш қилиш учун сутка давомида машғулот қилади. Бу ритмда у 40 ёшгача ўйнай олади! Айни вақтда унинг вазифаси "Мадрид"да 2016/2017 мавсум охиригача қолиш, кейин эса 2021 йилгача шартномани узайтиришдан иборат”, — дейди 48 ёшли агент.