2018 йил “Жаҳон чемпионати” арафасида Россияда 5 авлод тармоғи (5G) бета режимда ишга тушади. Уни яратиш билан “Мегафон” алоқа оператори ҳамда Хитойнинг “Huawei” компанияси шуғулланади.
“Бешинчи авлод тармоғининг бош вазифаси ишлатилаётган частоталар спектрини кенгайтиришдан иборат. Янги технология бутун дунё операторлари бош қотираётган муаммога ечим бўлиши кутилмоқда.
Тезкор мобил интернет ҳамда ҳамёнбоп гаджетлар сонининг кўпайганлиги сабаб интернет-трафик ҳажми ҳам анча ошди. Бешинчи авлод тармоғи алоқанинг сифатини оширади ҳамда кечикишининг олдини олади. Бунинг натижасида интернет тезлиги янада ошади. Масалан, видеолар биринчи сонияданоқ кўрсатишни бошлайди”, - дейилади “Мегафон” берган хабарда.
Россия бешинчи авлод тармоғи ишга тушган илк давлат бўлиши мумкин. Чунки Японияда “5G” 2020 йилда, Буюк Британияда эса 2022 йилда ишга тушиши режалаштирилган.