Маълум сабабларга кўра бироз кечикиб бўлса-да, Қашқадарё вилояти бўйлаб “Олтин куз” турнири старт олди. Эътиборлиси икки гуруҳда бўлиб ўтадиган турнирга 29 жамоа иштирок этиш учун талабнома топширди.
Мусобақа ўтказилиш тартиби
Мусобақа икки ёш тоифасида ўтказилиб, 20 ёшгача бўлган футболчилардан иборат жамоалар “А” гуруҳи(Ёшлар гуруҳи)да, ёши чекланмаган футболчилардан ташкил топган жамоалар “В” гуруҳида тўп суришади. Ҳар икки гуруҳ учун алоҳида кубок мавжуд бўлиб, гуруҳлардаги жамоалар фақат ўз ёш тоифасида ўйинларни ўтказишади.
“А” гуруҳи
“А” гуруҳида 13 жамоа 4 та ҳудудга бўлиниб ўйинларга киришади. Шарқий ҳудуд ўйинлари Чироқчи шаҳрида ўтказилиб, Шаҳрисабз ФМ(футбол мактаби), Чироқчи ФМ(футбол мактаби) ҳамда “Афсонавий Кўкдала” жамоалари иштирок этишади. Жанубий ҳудуд ўйинлари Ғузор шаҳрида ўтказилиб, “Шўртан”ФМ, “Нишон”ФМ ҳамда “Нуристон” жамоалари куч синашишади. Марказий ҳудуд жамоалари Қарши шаҳрида, Ғарбий ҳудуд жамоалари Касби шаҳрида ўйинларни ўтказишади. Марказий ҳудуд ғолиблиги учун “Бинокор”, “Олимпия”, “Насаф”ФМ, “Пахтачи” жамоалари, Ғарбий ҳудуд ғолиблиги учун Касби ФМ, “Аланга-2”, “Машъал”ФМ жамоалари курашишади.
“В” гуруҳи
“В” гуруҳида 16 жамоа 4 та ҳудудга бўлиниб ўйинларга киришади. Яккабоғнинг “Семурғ”, Қамашининг “Зафар”, Китобнинг “Нефтчи” ҳамда Чироқчининг “Чироқчи” жамоалари Шарқий ҳудудда, Ғузорнинг тўрт жамоаси – “Оқ бўрилар”, “Оқ олтин”, “Локомотив” ва “Аланга” жамоалари Жанубий ҳудудда, “Бинокор”, “Олимпия”, Миришкорнинг “Парвоз” ва Қарши муҳандислик иқтисодиёти институтининг “Иқтисодчи” жамоалари Марказий ҳудудда, Косоннинг “Бунёдкор”, “Микрокредитбанк”, Касбининг “Навбаҳор”, Муборакнинг “Қарлиқ” жамоалари Ғарбий ҳудудда баҳсларга киришишади.
Чорак финал
Ҳар бир ҳудуддан иккитадан жамоа кейинги босқичга чиқади. Чорак финал ўйинлари Осиё чемпионлар лигаси нимчорак финал учрашувлари каби ўтказилади. Ўтказилган битта ўйин ғолиби ярим финалга йўл олади. Жавоб учрашуви ўтказилмайди. Шарқий ҳудуд ғолиби ўз майдонида Жанубий ҳудудда иккинчи ўринни олган жамоани қабул қилади. Жанубий ҳудуд ғолиби ҳам ўз навбатида Шарқий ҳудудда иккинчи ўринни эгаллаган жамоани ўз майдонида қабул қилади.
Марказий ҳудуд ғолиби ўз майдонида Ғарбий ҳудудда иккинчи ўринни олган жамоани қабул қилса, Ғарбий ҳудуд ғолиби ўз майдонида Марказий ҳудудда иккинчи ўринни эгаллаган жамоа билан куч синашади.
Юқоридаги шартлар ҳар икки гуруҳ учун ҳам амалда бўлади.
Ярим финал ва финал
Ярим финал ва финал учрашувлари Қарши шаҳрида ўтказилади. Ғолиб жамоалар ва ҳар бир номинациялар бўйича футболчилар ташкилотчилар томонидан тақдирланишади.
