ФИФА бугун терма жамоаларнинг янги рейтингини эълон қилди. Ўзбекистон терма жамоаси ноябрь ойи рейтингида бирданига 9 поғона пастлаб, 74-ўринга тушиб кетди. Терма жамоамиз октябрь ойи рейтинги билан таққослаганда 50 балл йўқотган.

Осиёнинг барча кучли терма жамоаларида пасайиш кузатилган. Эрон 5, Япония бир ўрин пастлаши оқибатида японлар Осиёнинг энг яхши терма жамоасига айланишди. Япония 53, Эрон эса 56-поғоналарга жойлашишди. Жанубий Корея эса Ўзбекистондан ўтиб кетиб, 69-ўринни банд этмоқда ва Осиёнинг учинчи жамоасига айланди. Кейинги ўринларни БАА (85), Иордания (86), Уммон (96) ва Қатар (98) терма жамоалари банд этишган.

Осиё Кубогида Ўзбекистон терма жамоаси билан бир гуруҳдан жой олган терма жамоаларда қуйидагича ўзгаришлар юз берди: Хитой (99-ўрин, 11 поғона пастлаш), Саудия Арабистони (106, -9), КХДР (137, +11).

Жадвалнинг дастлабки 6та ўрнида ҳеч қандай ўзгариш юз бермаган. Тартиб бўйича Германия, Аргентина, Колумбия, Бельгия, Голландия, Бразилия кетма-кет жойлашишган. Португалия 2та ўрин юқорига кўтарилиб, 7-ўринга чиқиб олди.

Янги рейтинг билан ФИФА расмий сайтида танишиб олишингиз мумкин.