Ўзбекистон ногирон-ампутантлар терма жамоаси Жаҳон чемпионатида иштирок этиш учун Мексикага етиб борди. Мавзур Умархўжаев бош мураббийлигидаги ампутантларимиз уч карра жаҳон чемпиони ҳисобланади ва улар амалдаги чемпион сифатида ўз унвонларини ҳимоя қилишади.

Ўзбекистон терма жамоаси “А” гуруҳида Бразилия, Ирландия ва Украина терма жамоаларига қарши баҳс олиб боради. Терма жамоамиз мундиалдаги илк ўйинини 30 ноябрь куни Украина терма жамоасига қарши ўтказса, 1 декабрь Ирландия, 2 декабрь санасида Бразилия билан ҳисоб-китоб қилинади.

Маълумот ўрнида айтиш жоиз, 8 декабрга қадар давом этадиган жаҳон чемпионатига Мексиканинг Кулиакан шаҳри мезбонлик қилади ва мундиалда жами 22 та терма жамоа иштирок этади.