Маурицио Зампаринининг таъкидлашича, яна роппа-роса 2 йилдан кейин «Палермо» ҳужумчиси дунёнинг энг кучли футболчисига айланади. Бу дадил башоратнинг нечоғли ҳақиқат ёки лоф эканлигини албатта, вақт кўрсатади. Лекин футболчининг ёшликдаги устози Франсиско Бутелер футбол оламига янги Хуан Рамон Рикельмени эмас, балки бўлажак Серхио Агуэрони ҳадя этганини мамнуният билан таъкидлашмоқда. Хўш, яқин келажакда Мессидек ёрқин юлдузни ортда қолдириши кутилаётган ўша ноёб иқтидор соҳиби ким?

Катта-кичиклигидан қатъий назар, Аргентинадаги ҳар қайси шаҳар ўзининг бўлажак мессилари, марадоналари, ҳеч бўлмаганда, батистуталарига эга. Бу фикрни мамлакатнинг истаган ёшу-қариси тасдиқлаши мумкин. Ҳатто ўша бўлажак юлдуз тўп сурадиган ерни кўрсатиб берадиган кўнгиллилар ҳам етарли. Бир тасаввур қилинг: агар ана шу ноёб иқтидор соҳибларининг ҳеч бўлмаганда 50 фоизи профессионал даражага етиб келишганида, мухлислар қайси юлдузнинг ўйинларини томоша қилиш кераклигини билмай шошиб қолган бўлишарди. Бироқ негадир бундай ҳолга ҳали-ҳанўз дуч келганимиз йўқ.

Атиги 7000 нафар аҳолиси бўлган Лагуна-Ларга ҳам ўзининг супер қаҳрамонига эга эди. Ҳа, юксак иқтидор соҳиби бўлмиш Кардобода яшай бошлади. У Аргентинанинг иккинчи дивизио­ни вакили - «Институто»да ўз дебютини нишонлаганида 17 ёшда эди. Буни қарангки, дебют мавсумдаёқ ҳужумчига айлантирилган плеймейкер 17 марта рақиблар дарвозасини ишғол этди. Шу тариқа Марио Кемпесдек афсонанинг рекордини янгилаб, клуб тарихидаги энг ёш тўпурар мақомини қўлга киритди.

Табиийки, бу сермаҳсул мерган европалик мутахассисларнинг эътиборидан четда қолмади. Ҳатто унинг иккинчи лигада тўп суриши ҳам қизиқишни сусайтирмади. Хуллас, «Челси», «Реал», «Манчестер Сити», «Ливерпуль», «Интер», «Милан», «Ювентус», «Бенфика» каби грандлар уни қўлга киритиш йўлларини излай бошладилар. Аммо «Палермо» президенти Маурицио Зампарини барча даъвогарларни ғафлатда қолдириб, устамонлик билан Дибалани ўз жамоасига қўшиб олди. «Ўйчи ўйлагунча таваккалчи ишини битиради» нақлига амал қилган сицилиялик «қари тулки» футболчининг агенти Гус­таво Маскарди (ўз вақтида Эрнан Креспо ва Хуан-Себастьян Веронларни Италияга олиб келган) билан учрашиб, масалани ҳал қилди. Шундан кейин «Инс­титуто» билан бўлган музокаралар шунчаки расмиятчилик бўлиб қолди. Умуман, мазкур трансфер учун президент ўз клуби тарихидаги рекорд маблағ - 12 млн. еврони сарфлади.

«Мен у билан шахсан таниш эмасман, аммо қандай тўп суришини кўрдим. У - бўлажак чемпион, янги Агуэро!»-дея хитоб қилди Зампарини Дибалани жамоатчиликка таништирар экан. Шундан кейин президент ўз ички туйғусига ишонган ҳолда қалтис таваккалга қўл урганини тан олди.

Маурицио Зампаранининг Италиядаги энг сабрсиз фунционерлардан бири эканлиги яхши маълум. У нафақат мураббийларни алмаштириш борасида, балки трансфер оламида ҳам тезкорликни хуш кўради. Ёши 80га яқинлашиб қолган киши қайсидир футболчига киритган сармояси арзигудек даромад беришини йиллаб кутишга тоқат қилолмайди. Эҳтимол, Пауло Дибала Зампарини учун Хавьер Пасторени «ПСЖ» сотгани каби мўмай даромад келтирадиган сўнгги имкониятдир. У аргентиналик ноёб иқтидор соҳибининг «олди-сотди»сидан ҳеч бўлмаганда, 28 «лимон» ишлаб олмоқчи. Аввалига «кекса овчи»ни бироз шошма-шошарликка йўл қўйди» деб баҳолашаётганди. Бироқ қисқа вақт ичида ўта омадли харидни амалга оширгани ойдинлашиб қолди.

Тўғри, аввалига Дибаланинг ишлари кўнгилдагидек кечмади. У Тиррен денгизи соҳилларига жойлашиб, Фабрицио Микколи билан дўстлашди. Шу тариқа ҳар томонлама кўмак олиб туриш имкониятига эга бўлди. Лекин дебют мавсумини бор-йўғи 3 гол билан якунлашга мажбур бўлди. Кейинги йили «Палермо» «В» сериясига тушиб кетди ва асосий ишонч бошқа ижрочилар - Кайл Лафферти билан Абель Эрнандесларга кўрсатилди.

Ниҳоят, учинчи уриниш (жорий мавсум)да Зампарини ўз жавоҳирининг ноёб иқтидоридан тўла фойдаланишга қарор қилди. Раҳбариятнинг Дибалага юксак ишонч билдирганига Абель Эрнандеснинг сотиб юборилгани ва Кайл Лаффертининг жамоани тарк этгани далил бўла олади. Демак, мутасаддиларининг бор умидлари ёлғиз Паулодан. Қолаверса, бош мураббий Жузеппа Якинни ихтиёрида италиялик Белотти, даниялик Макиенок ва португалиялик Жоао Силвадан бўлак ҳеч ким қолмаганди. Бундай рақобатда ғолиб чиқиш Дибалага ҳеч қандай қийинчилик туғдирмади.

Қисқаси, ўзининг ватандоши ва яқин дўсти бўлмиш Франко Васкеснинг доимий кўмаги эвазига Пауло ўз маҳоратини намойиш эта бошлади. Ҳозирча аргентиналик ҳужумчи Италия «А» сериясининг энг ёрқин кашфиёти бўлиб турибди. Ҳали мавсум оралиқ маррага етиб улгурмасдан, Пауло 7 голни ўз ҳисобига ёзиб қўйди. Қўшимчасига энг кўп зарба берадиган ва тутқич бермас ҳужумчилардан бири сифатида бир қатор эътиборли натижаларни қайд этди:

1) спортчиларга хос худбинлик билан Кристиан Сапатадек тажрибали касбдошидан ўзиб кетди;

2) чап оёғи билан заргарона аниқликдаги зарбаларни амалга оширди;

3) рақиб жарима майдончаси ичида товонининг орқа томонини ишга солиб, дарвозабонни шарманда қилди;

4) Ҳатто Жанлуиджи Буффонни ҳам жазолашга уриниб кўрди.

Хуллас, Дибала ўзи каби маҳорат соҳиблари учун ҳар қанча маблағ сарфланса арзишини исботлади. Зампарини эса ўз жавоҳирига харидорларнинг қизиқишларини ошириш билан овора: «Ҳозирда Италиянинг тенгсиз ҳужумчисига айланган Дибала яна 2 йилдан кейин дунёнинг тенги йўқ ўйинчисига айланади! Президентнинг фикрича, Паулонинг баҳоси камида 42-50 млн. евро.

P.S.: Паулонинг бобоси - Болеслав Дибала иккинчи жаҳон уруши даврида Польшадан Аргентинага ўтиб кетган. Демак, Паулода Польша, Италия ёки Аргентина терма жамоаларида тўп суриш имконияти мавжуд. У Польша ва Италиянинг таклифларини рад этди. Кўриниб турибдики, Дибала қачонлардир «Альбиселестс» шарафини ҳимоя қилиш ниятида.