2015 йилнинг 4-9 январь кунлари Россиянинг Пермь шаҳрида шахмат бўйича анъанавий халқаро турнир ўтказилди. Мазкур халқаро турнирда Россия, Ўзбекистон, Арманистон, Беларусь, Қозоғистон, Украина ва Мўғилистон давлатларидан 20 нафар спортчи ғолиблик учун дона сурди.
Тўққиз турдан иборат бўлган мусобақалар якунларига кўра 6,5 очко жамғарган Анастасия Рахмангулова (Украина) биринчи ўринни эгаллади. Ғолибдан ярим очко кам жамғарган Андрей Рахмангулов (Украина) иккинчи, россиялик Ирина Дроговоз учинчи ўринни банд этди.
Ушбу халқаро турнирда Ватанимиз шарафини ҳимоя қилган Севара Боймуратова 5, 5 очко билан тўртинчи, 5 очко тўплаган Сарвиноз Қурбонбоева саккизинчи, 9 имкониятдан 4 очко жамғарган Владимир Егин эса 13-ўринни эгаллади.
