Эндиликда гандбол бўйича учрашувлар икки тайм эмас, балки уч таймда ўтади.

Бу янгилик биринчи бўлиб ўсмирлар орасидаги Ўзбекистон чемпионати иштирокчилари орасида синовдан ўтказилди. Чемпионатда ғолиблик учун 15 жамоа, яъни барча вилоятлар, Тошкент шаҳри ва Қорақалпоғистон Республикаси вакиллари куч синашди.

“Учрашувларни ўтказишнинг бундай тизими спортчиларнинг ўзаро ҳаракатларини яхшилаш, ҳаракатларнинг тезлигини ошириш мақсадида жорий қилинди. Биринчи таймда кўпроқ персонал ўйин олиб борилади, бунда ҳар бир ўйинчи ҳужум қилишга ва тўпсиз ҳаракат қилишни ўрганади. Иккинчи таймда 3х3 ҳимоя усули қўлланади. Бунда гандболчиларнинг фикрлаши, ҳимоялана олиш уқувлари текширилади. Учинчи таймда қандай ўйин олиб борилиши мураббийларнинг ихтиёрига қолдирилади”, деб айтди Ўзбекистон гандбол федерацияси бош котиби Исмоил Матхолиқов.

Гандбол бўйича ўсмирлар ўртасида Ўзбекистон чемпионати “Умид ниҳоллари” саралаш ўйинлари олдидан “бош репетиция” бўлди. Айнан шунинг учун ностандарт ўйинларни ўтказишга эҳтиёж пайдо бўлди: бу жамоаларнинг кучли ва заиф томонларини аниқлашга имкон берди.

Чемпионатнинг олтин медалини Андижон вилояти жамоаси қўлга киритди. Кумуш медални тошкентлик гандболчилар тақишга муваффақ бўлдилар. Ғолиблар шоҳсупасининг учинчи поғонасидан Фарғона вилояти спортчилари жой олишди.